Ucuz və geniş yayılmış bir dərmanın COVID-19 infeksiyasından sonra ortaya çıxan uzunmüddətli simptomların qarşısını almaqda təsirli ola biləcəyi bildirilir. Mütəxəssislərin fikrincə, bu vəziyyət koronavirusdan sağalan insanların əhəmiyyətli bir hissəsində müşahidə olunur.
Lent.az xarici mediaya istinadən xəbər verir ki, söhbət metformin adlı preparatdan gedir.
Uzunmüddətli COVID-ə qarşı hansı dərman kömək edə bilər?
Yeni elmi məlumatlar göstərir ki, metformin uzunmüddətli COVID simptomlarının yaranma riskini əhəmiyyətli dərəcədə azalda bilər. Metformin artıq 60 ildən çoxdur ki, 2-ci tip diabetin müalicəsində istifadə olunur və hazırda dünya üzrə təxminən 200 milyon insan tərəfindən qəbul edilir.
University of Minnesota alimlərinin apardığı araşdırmada COVID-19-a yoluxmuş yetkin xəstələrin iştirak etdiyi bir neçə klinik sınağın nəticələri təhlil edilib. Araşdırmanın nəticələri ümidverici olub: yoluxma zamanı və ya qısa müddət sonra 14 gün ərzində metformin qəbul edən hər 50 nəfərdən birində uzunmüddətli COVID halının qarşısını almaq mümkün olub.
Mütəxəssislər hesab edirlər ki, metformin virusun çoxalmasına mane olur və iltihabəleyhinə təsiri sayəsində immun sisteminin infeksiyaya daha effektiv cavab verməsinə kömək edir. Preparatın əsas üstünlüklərindən biri isə onun əlçatan və nisbətən ucuz olmasıdır.
Preparatın riskləri varmı?
Metformin adətən yaxşı tolere olunur. Lakin bəzi hallarda mədə-bağırsaq sistemi ilə bağlı yan təsirlər, ürəkbulanma, ishal və qarın nahiyəsində diskomfort müşahidə oluna bilər. Alimlər hələlik bu preparatın uşaqlarda uzunmüddətli COVID-in profilaktikası məqsədilə istifadə olunub-olunmayacağını dəqiqləşdirə bilməyiblər.
Müsbət nəticələrə baxmayaraq, həkimlər vurğulayırlar ki, hər hansı dərman yalnız mütəxəssis məsləhəti ilə qəbul edilməlidir. Metformin təkbaşına və ya digər müalicə üsulları ilə birlikdə istifadə oluna bilər, lakin mütləq tibbi nəzarət tələb edir.
Uzunmüddətli COVID nədir və niyə təhlükəlidir?
Tədqiqatçıların qiymətləndirməsinə görə, koronavirusdan sağalan hər dörd nəfərdən birində simptomlar üç aydan çox davam edə bilər. Bu əlamətlərə güclü yorğunluq, diqqət pozğunluğu, öskürək və sinə ağrıları daxildir. Məhz bu səbəbdən alimlər uzunmüddətli COVID-in qarşısının alınması üçün effektiv profilaktik üsullar üzərində intensiv araşdırmalar aparırlar.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
