Alimlər araşdırma apararaq uşağın hansı yaşda dünyaya gətirilməsinin daha uyğun olduğunu izah ediblər.
Lent.az xarici mediaya istinadən xəbər verir ki, alimlərinin fikrincə, ilk uşağın dünyaya gətirilməsi üçün ideal yaş 29 hesab olunur. Araşdırma göstərib ki, ilk uşağın hansı yaşda dünyaya gətirilməsi insanın gələcək sağlamlığına və həyat məmnuniyyətinə təsir göstərə bilər. Məlum olub ki, 29 yaş bu baxımdan ən optimal dövr sayılır.
Tədqiqatçılar müəyyən ediblər ki, 25 yaşdan əvvəl valideyn olan insanlar sonrakı illərdə daha gec valideyn olanlarla müqayisədə daha az gəlir əldə edirlər.
Araşdırma nəticələrinə görə, ilk uşağın daha gec yaşda dünyaya gəlməsi insanın həm sağlamlığına, həm də maddi rifahına müsbət təsir edir. Bu üstünlüklər xüsusilə 30 yaşa yaxın dövrdə maksimum səviyyəyə çatır.
“Bu araşdırmanın nəticələrinə əsasən, ilk uşağın dünyaya gətirilməsi üçün ən uyğun yaş 26-31 yaş aralığı hesab edilə bilər", - araşdırma müəllifləri vurğulayırlar.
Alimlərin sözlərinə görə, məhz bu dövrdə insanların fiziki və psixi sağlamlığı, gəlir səviyyəsi və təhsil göstəriciləri daha sabit olur. Araşdırma çərçivəsində universitetin mütəxəssisləri uşağı olan 6282 yetkin şəxsin məlumatlarını təhlil ediblər. Onlar iştirakçıların ilk dəfə valideyn olduqları yaşı müəyyən edib, eyni zamanda onların həyat nailiyyətləri barədə məlumat toplayıblar.
Nəticələr göstərib ki, valideyn olma yaşı təhsil uğurları ilə sıx əlaqəlidir. İlk uşağın daha gec yaşda dünyaya gətirilməsi ali təhsil alma ehtimalını artırır. Məsələn, universitetə daxil olmaq və təhsilini davam etdirmək şansı yüksəlir. Eyni zamanda yüksək gəlir əldə etmək ehtimalının da valideynliyi təxirə saldıqca artdığı və 26-31 yaş aralığında sabitləşdiyi müəyyən olunub.
Araşdırmada yeniyetmə yaşlarında və ya 20 yaşların əvvəllərində valideyn olan şəxslərin gələcəkdə fiziki sağlamlıqlarını daha zəif qiymətləndirdikləri bildirilib. Bu mənfi əlaqə isə valideynliyi daha gec yaşa saxlayanlarda azalaraq təxminən 26 yaşdan sonra sabitləşib.
Ümumilikdə alimlər müəyyən ediblər ki, daha gec yaşda ilk dəfə valideyn olan insanlar psixi sağlamlıqlarını daha yaxşı qiymətləndirirlər.
Bununla yanaşı, həyat məmnuniyyətinin isə valideyn olma yaşından ciddi şəkildə asılı olmadığı qeyd olunub. Araşdırma müəllifləri bildiriblər ki, nəticələr “liminallıq nəzəriyyəsi” adlanan konsepsiyanı dəstəkləyir.
Bu nəzəriyyəyə görə, insan həyatındakı keçid dövrlərində məsələn, məktəbi bitirmək və ya valideyn evindən ayrılmaq mərhələsində valideyn olduqda şəxsi inkişaf müəyyən qədər dayanmış kimi görünə bilər.
Bu da izah edir ki, niyə bəzi insanlar həyatın “açar mərhələlərində” valideyn olduqda həmin dövrdə “ilişib qalmaq” hissi yaşayırlar.
Bununla belə, alimlər vurğulayıblar ki, araşdırmanın nəticələri gənc yaşda valideyn olan insanların uğur qazana bilməyəcəyi anlamına gəlmir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
