Sumqayıtdakı orta məktəbdə kütləvi zəhərlənmə

Zəhərlənən 47 şagirddən 2-nin vəziyyəti ağırdır

Sumqayıt şəhərində məktəblilər arasında kütləvi zəhərlənmə baş verib.

Hadisə 38 saylı məktəbdə qeydə alınıb. Lent.az-ın məlumatına görə, məktəbin direktoru Nadir Atakişiyevin ANS PRESS-ə deyib ki, xəstəxanaya aparılan uşaqların sayı 47 nəfər olub. Onlardan iki qızın vəziyyəti daha ağırdır. Zəhərlənənlər məktəbin 3-8-ci sinif şagirdləridir.

İlkin məlumata görə, şagirdlər "suxari"dən, yəni qurudulmuş çörəkdən zəhərləniblər. Məlumatlara görə, saxlama müddəti 2009-cu ilin may ayında bitmiş məhsulu məktəbin ərazisində “VAZ 2106” markalı avtomobillə gələn 3 nəfər paylayıb.

Artıq polis şagirdlərə bu məhsulu paylayan şəxslərdən birini saxlaya bilib. Araşdırmalar nəticəsində bəlli olub ki, bu şəxslər “Slint” firmasının əməkdaşları olublar.

Şəhər prokurorluğunda faktla bağlı araşdırma aparılır.