“Koroğlu” ASC-nin 65 min dolları mənimsənilib

Pulları mənimsəməkdə təqsirləndirilən Naxçıvan sakini həbs edilib

“Koroğlu” Açıq tipli Səhmdar Cəmiyyətinin (ASC) 65 min ABŞ dolları məbləğində pulunu mənimsəyən şəxs həbs edilib.

Bu barədə APA-ya Sabunçu rayon Polis İdarəsindən məlumat verilib.

Məlumata görə, Naxçıvan Muxtar Respublikasının sakini, 1984-cü il təvəllüdlü Nurlan Ehtiram oğlu Əzimov Cinayət Məcəlləsinin 178-ci (dələduzluq) maddəsi ilə təqsirli bilinir. O, Bakı şəhərində fəaliyyət göstərən “Koroğlu” ASC-nin 65 min dollar pulunu mənimsəyib.

Sabunçu rayon Polis İdarəsinin 12-ci Polis Bölməsi əməkdaşlarının həyata keçirdikləri əməliyyat-axtarış tədbirləri nəticəsində N. Əzimov Naxçıvanda tutularaq Bakı şəhərinə gətirilib.

Hazırda onun barəsində başlanan cinayət işi üzrə zəruri istintaq tədbirləri davam etdirilir.