Nəqliyyat Nazirliyi və yol polisi birgə reydlər keçirir

Bu gündən etibarən magistral yollarda normadan artıq yük daşıyan avtomobillərə qarşı reydlərə başlayıb. Nəqliyyat Nazirliyi “Azəryolservis” ASC-nin mətbuat xidmətinin rəhbəri Pünhan Mürsəliyevin Lent.az-a verdiyi məlumata görə, səhər saatlarından etibarən Bakı-Quba-Rusiya sərhədi və Bakı-Ələt-Qazax magistrallarında reydlər həyata keçirilir: “Hər iki magistral boyunca tərəzilər quraşdırılıb. Nəqliyyat vasitəsinin oxuna düşən yük normadan artıq olarsa, həmin maşındakı artıq yük boşaldılır və bundan sonra sürücünün nəqliyyat vasitəsi ilə birgə hərəkətinə icazə verilir. Reyd zamanı yol polisinin “saxla” tələbinə əməl etməyən sürücülər də var. Həmin maşınların nömrələri götürülür və barələrində qanuna müvafiq tədbirlər görüləcək. Reydlər müntəzəm olaraq davam edəcək. Bunun ölkənin bütün magistral yollarında həyata keçirilməsi də nəzərdə tutulub”.