Sevgi hekayələrinin hamısı yağış altında qucaqlaşmaq və musiqi sədaları altında final öpüşü ilə bitmir. Bəzi filmlər özündən sonra acı bir dad, yuxudan əvvəl uzun düşüncələr və sadə cavabı olmayan suallar qoyur.
Lent.az şirin nağılı olmayan, lakin ehtiras, ağrı, seçim və nəticələrin olduğu sevgi haqqında altı filmi təqdim edir.
Wuthering Heights (2026)
Emili Brontenin kult romanının yeni ekranlaşdırması bizi yenidən sevginin işıqlı bir hiss deyil, bir fırtına olduğu dünyaya qaytarır. Qəhrəmanların ətrafdakı hər şeyi məhv edən ehtirası haqqında hekayə. Burada harmoniya yoxdur, yalnız vəsvəsə, qısqanclıq və nəyin bahasına olursa-olsun öz haqlılığını sübut etmək istəyi var. Bu hekayədən sonra işığı söndürüb rahatca yatmaq çətindir.
Blue Valentine (2010)
Romantik ad aldadıcıdır. Rayan Qoslinq və Mişel Uilyamsın baş rollarda çəkildiyi bu film sevginin başlanğıcını deyil, dağılmasını göstərir. Tamaşaçı eyni anda cütlüyün necə aşiq olduğunu və bir-birini tədricən necə itirdiyini görür. Bu, hisslərin məişətə, yorğunluğa və deyilməmiş incikliklərə hər zaman dözmədiyi haqqında çox dürüst bir hekayədir. İzlədikdən sonra ya sevdiyiniz insanı qucaqlamaq, ya da uzun müddət susmaq istəyirsiniz.
Remember Me (2010)
İlk baxışdan bu, mürəkkəb münasibətlər haqqında növbəti bir romantik dramdır. Lakin final hər şeyi dəyişir. Bu film səssizcə, bağırmadan işləyir, amma birbaşa ürəkdən vurur. O xatırladır ki, həyat qəfil qırıla bilər və bəzi sözləri məhz indi demək lazımdır. Məhz buna görə də lent insanı uzun müddət buraxmır.
Pride & Prejudice (2005)
Ceyn Ostinin klassik hekayəsi bu siyahıdakı digər filmlərdən daha işıqlı görünür, lakin burada da hər şey o qədər sadə deyil. Elizabet və cənab Darsi anlaşılmazlıqdan, qürurdan və hekayələrini məhv edə biləcək səhvlərdən keçirlər. Bu kino yüngül sevgi haqqında deyil, öz üzərində daxili iş görmək haqqındadır. Final ümid versə də, ona gedən yol şübhələr və itkilərlə doludur.
Jane Eyre (2011)
Hətta qəlbi başqa bir şey istədikdə belə ləyaqətini seçən bir qadın haqqında təmkinli və atmosferik dram. Burada sevgi şirin deyil, sirlər və çətin qərarlarla dolu mürəkkəb bir hissdir. Film özündən sonra sükut və dərinlik hissi qoyur. Bu, yalnız hisslər haqqında deyil, həm də xarakterin gücü haqqında bir hekayədir.
Girl with a Pearl Earring (2003)
Burada sevgi demək olar ki, hər yerdədir; o, baxışlarda, sükutda, rənglərdə və işıqdadır. Rəssam və onun muzası haqqında olan bu lent açıq ehtirasdan deyil, iki insan arasındakı gərginlikdən bəhs edir. Məhz bu "deyilməmişlər" filmi xüsusilə dərin edir. Axı baş verməyən şeylər bəzən xəyanətdən daha çox incidir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
