Kenquru iti suya sürüyib sahibini vəhşicəsinə döydü - VİDEO

Avstraliyada Kol adlı kişi kenqurunun əlindən iti xilas etməyə çalışıb və ağır xəsarətlərlə xəstəxanaya yerləşdirilib.

Lent.az xarici mediaya istinadən xəbər verir ki, Kol, bəndin yaxınlığında bir dostu ilə pivə içərkən birdən itinin hürdüyünü eşitdiyini söyləyib. Səsin mənbəyinə tərəf qaçıb və bir kenqurunun ev heyvanını tutub suya sürüklədiyini görüb. Düşünmədən çubuq götürüb və kenqurunun üstünə hücum edib.

Heyvan iti buraxıb və Kol dostundan onu aparmasını istəyib. Kenquru qəfildən ona tərəf tullanaraq başı ilə üzünə vuranda özü artıq sudan çıxmağa başlayıb. Kolun sözlərinə görə, kenquru raket kimi sürətli idi. Heyvan onu vəhşicəsinə döyməyə davam edib və dayanmadan nərildəyib.

"Onun kiçik qremlin kimi pəncələri başımı tutdu", - Kol xatırladıb. O, xilas olmağa çalışıb, amma kenquru buraxmayıb. Nəhayət, kenquruya kürəklə vuran dostu onu xilas edib və kenquru qaçıb.

Kol xəstəxanaya aparılıb. Həkimlər onun xəsarətlərinin çox ağır olduğunu, sanki qəzaya düşmüş kimi göründüyünü bildiriblər. O, kenquru ilə qarşılaşmanın bir dəqiqədən çox davam etmədiyini, lakin bunun üçün xəstəxanada altı saat keçirməli olduğunu bildirib.

"Kenqurunun məni döydüyünə bir az utanıram", - kişi etiraf edib. "Amma onun yeni sviterimi cırdığına daha çox əsəbiləşdim".