Civə termometrləri hələ də bir çox insan tərəfindən istifadə olunur. Lakin belə termometr qırıldıqda bu, sağlamlıq üçün ciddi təhlükə yarada bilər. Qırılmış civəli termometr insanlarda qorxu yaradan hallardan biridir.
Civə zəhərli maddədir və onun buxarları nəfəs aldıqda orqanizm üçün zərərli ola bilər. Buna görə də civə ilə təması dərhal məhdudlaşdırmaq və düzgün təmizləmə aparmaq vacibdir.
Lent.az xarici mediaya istinadən xəbər verir ki, mütəxəssislərin tövsiyəsinə görə, ilk növbədə otaqdan bütün insanlar və heyvanlar çıxarılmalıdır.
Daha sonra pəncərələr açılaraq otaq havalandırılmalıdır. Eyni zamanda, güclü hava axını yaratmaqdan çəkinmək lazımdır ki, civə damcıları otağa yayılmasın.
Civəni toplayarkən ehtiyatlı davranmaq vacibdir. Bunun üçün kağız və ya karton parçasından istifadə etmək olar. Həmçinin rezin armud və ya şpris, eləcə də xırda hissəcikləri toplamaq üçün yapışqan lentdən istifadə etmək tövsiyə olunur.
Toplanan civə damcıları su ilə doldurulmuş, ağzı möhkəm bağlanan şüşə qabda saxlanılmalıdır.
Bəzi hallarda isə müəyyən hərəkətlər qəti qadağandır. Civəni toplayarkən tozsoran istifadə etmək olmaz, çünki bu, civəni daha da yayaraq havaya qarışdırır. Süpürgə ilə yığmaq da düzgün deyil, çünki civə damcıları daha xırda hissələrə parçalanır. Bundan əlavə, civəni məişət tullantıları ilə birlikdə atmaq və ya kanalizasiyaya tökmək olmaz.
Civə otaq temperaturunda sürətlə buxarlanan metal olduğu üçün xüsusilə təhlükəlidir. Onun buxarları tənəffüs yolları ilə orqanizmə daxil olur və zamanla yığılaraq zəhərlənməyə səbəb ola bilər. Əgər civə tam təmizlənməzsə, bu proses davam edərək sağlamlığa ciddi zərər verə bilər.
Kiçik uşaqlar və heyvanlar civə damcılarını udmaq riski ilə də üzləşə bilər. Bu, civə buxarını nəfəs almaq qədər təhlükəli olmasa da, yenə də yol verilməməlidir.
Civə ilə zəhərlənmənin əsas əlamətləri baş ağrısı, halsızlıq, iştahanın azalması, ağızda metal dadı, ürəkbulanma, qusma və əllərdə titrəmə kimi özünü göstərə bilər. Uzun müddət və yüksək miqdarda civə ilə təmas isə daxili orqanların fəaliyyətində ciddi pozğunluqlara səbəb ola bilər.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
