722 milyon qrivna (təxminən 29 milyon 672 min manat) məbləğində rüşvət almaqda təqsirləndirilən Ukraynanın Dövlət Fiskal Xidmətinin keçmiş rəhbəri Azərbaycan əsilli Roman Nəsirovun hökmü doqquz illik gözləmədən sonra rəsmi olaraq qüvvəyə minib.
İllərlə davam edən gecikmələrdən sonra Ukrayna Ali Antikorrupsiya Məhkəməsinin Apelyasiya Palatası Dövlət Fiskal Xidmətinin keçmiş rəhbəri Roman Nəsirovun hökmünü qüvvədə saxlayıb.
Lent.az Ukrayna mediasına istinadən bildirir ki, bu barədə Korrupsiyaya Qarşı Mübarizə Mərkəzi məlumat verib.
O, vəzifə səlahiyyətlərindən sui-istifadə etməkdə təqsirli bilinib və bununla da, dövlətə 2 milyard qrivnadan çox (45 min dollardan çox) ziyan vurub.
Proses zamanı çıxış edən Nəsirov özü "qanunsuz" hökmün ləğv edilməsini və günahsız elan edilməsini istəyib. Qeyd etmək lazımdır ki, Nəsirovun işi təxminən doqquz il davam edib və bunun altısı məhkəmədə keçirilib.
Birinci məhkəmə instansiyasının hökmü müddətin bitməsindən cəmi altı ay əvvəl çıxarılıb. Buna görə də, apellyasiya hakimi işi müddətin bitməsindən əvvəl başa çatdırmaq tapşırığı ilə üzləşib.
"Nəticə etibarilə, bu hökm təkcə yüksək səviyyəli korrupsioner məmurun həbs olunması ilə bağlı deyil, həm də Ali Korrupsiyaya Qarşı Mübarizə Məhkəməsinin bu cür şəxslərə qarşı işlərə baxmaq qabiliyyətinin sınağıdır və məhkəmə bundan uğurla keçib", - Korrupsiyaya Qarşı Mübarizə Mərkəzi qeyd edib.
Məhkəmə Nəsirovu altı il müddətinə azadlıqdan məhrum edib. Ona məhkəməyəqədər həbsdə çəkilmiş müddət hesablanaraq, hər iki həbs günü üçün (2 mart 2017-ci ildən 16 mart 2017-ci ilədək, 24 aprel 2025-ci ildən 9 may 2025-ci ilədək və 31 oktyabr 2025-ci ildən 2 aprel 2026-cı ilədək) məhkəməyəqədər həbsdə bir gün hesablanıb.
Hesablamalara görə, bu, 368 gün və ya bir ildən bir qədər çoxdur. Buna görə də, Roman Nəsirov təxminən beş il həbs cəzası çəkməli olacaq.
Nəsirov işi
Xatırladaq ki, Nəsirov 2017-ci ildə korrupsiya şübhəsi ilə həbs olunub. Səhhətindəki problemlərə görə qısa müddətə “Feofaniya” xəstəxanasında müalicə alıb. 2018-ci ilin əvvəlində Nazirlər Kabineti Dövlət Fiskal Xidmətinin rəhbərini vəzifəsindən azad edib.
2019-cu ilin noyabr ayında Ali Korrupsiyaya Qarşı Mübarizə Məhkəməsi Dövlət Fiskal Xidmətinin keçmiş rəhbərinə qarşı işi araşdırmağa başlayıb.
2022-ci ilin oktyabr ayında Milli Korrupsiyaya Qarşı Mübarizə Bürosu Nəsirovu xüsusilə böyük miqdarda (722 milyon qrivna) rüşvət almaqda şübhəli bilindiyi barədə məlumatlandırıb.
2025-ci ildə Nəsirov cəzadan yayınmaq üçün Ukrayna Silahlı Qüvvələrinə səfərbər olmağa cəhd edib. Lakin hərbi təlim kursunu bitirdikdən bir gün sonra Ukrayna Silahlı Qüvvələri onun səfərbər edilməsi əmrini ləğv edib.
Roman Mikayıl oğlu Nəsirov 1979-cu il martın 3-də Kiyevdə anadan olub. Atası Mikayıl Nəsir oğlu Nəsirov 1976-cı ildə Azərbaycandan Ukraynaya köçüb və ukraynalı xanımla ailə qurub. Bu nikahdan doğulan Roman Nəsirov orta məktəbi Kiyevdə bitirdikdən sonra əvvəlcə T. Şevçenko adına Kiyev Dövlət Universitetinin hüquq fakültəsində, daha sonra isə Şərqi London Universitetində (University of East London, STM) maliyyə və beynəlxalq menecment ixtisası üzrə təhsil alıb.
Uzun müddət bank sektorunda fəaliyyət göstərib. Daha sonra “Konkord Kapital” (Kiyev) investisiya şirkətinin Qiymətli kağızlarla ticarət idarəsinin rəhbəri vəzifəsində çalışıb. 2013-cü ilin aprelində Ukrayna Dövlət Ərzaq-Taxıl Korporasiyasının İdarə Heyətinin sədr müavini vəzifəsinə təyin olunub və 1 il bu vəzifədə işləyib.
2014-cü il oktyabrın 26-da Ukrayna Ali Radasına keçirilən növbədənkənar seçkilərdə prezident Pyotr Poroşenkonun blokundan deputat seçilib. Parlamentin Gömrük və vergi siyasəti komitəsinin sədri olub.
Ailəlidir, Mikayıl və Aleksandr adlı iki övladı var.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
