Həbs olunan azərbaycanlılar İsraildən İordaniyaya aparılır - EKSKLÜZİV

Fələstinin Qəzza zolağına 6 gəmidən ibarət “Azadlıq donanması” ilə humanitar yardım aparan və mayın 31-nə keçən gecə İsrail hərbçilərinin keçirdiyi əməliyyat nəticəsində həbs olunmuş iki nəfər Azərbaycan vətəndaşı İordaniyaya gətirilir. Bu barədə Lent.az-a eksklüziv açıqlamasında Azərbaycanın İordaniyadakı fövqəladə və səlahiyyətli səfiri Elman Araslı məlumat verib.

O deyib ki, gəmidə həbs olunan şəxslərin bir hissəsi artıq İsraildən İordaniyaya göndərilib: “Həmin şəxslər İordaniya hüdudlarına az əvvəl keçiblər, indi yoldadırlar, gəlirlər. Bu qrupda gələnlər arasında azərbaycanlıların olub-olmaması barədə hələlik məlumat yoxdur. Yaxın saatlarda bu məsələni dəqiqləşdirəcəyik”.

Deportasiya olunan şəxslər hissə-hissə İordaniyanın paytaxtı Əmman şəhərinə gətirilərək mehmanxanaya gətiriləcək.

Azərbaycanın Xarici İşlər Nazirliyinin (XİN) mətbuat xidmətinin rəhbəri Elxan Poluxov isə Lent.az-a bildirib ki, hələlik həbs olunan azərbaycanlıların şəxsiyyəti müəyyənləşdirilməyib: “Yaxın saatlarda ətraflı məlumat veriləcək”.

Pərvin ABBASOV