Dost qatilinə 8 il həbs cəzası

Mayın 25-də Ağır Cinayətlərə Dair İşlər üzrə Məhkəmədə dostunu qətlə yetirməkdə təqsirləndirilən Füzuli rayon sakininin cinayət işi üzrə məhkəmə prosesi başa çatıb.

Lent.az-ın məlumatına görə, hakim İradə Həsənzadənin sədrliyi ilə keçirilən prosesdə təqsirləndirilən Söhrab Rüstəmova hökm oxunub. Hökmə əsasən, S.Rüstəmov 8 il müddətinə azadlıqdan məhrum edilib.

2009-cu il dekabrın 21-də Suraxanı rayonunda Şamaxı rayon sakini, 1954-cü il təvəllüdlü Yaşar Cəbrayıl oğlu Alışanovun meyiti aşkarlanıb. Onun dostu Söhrab Rüstəmov tərəfindən qətlə yetirildiyi məlum olub.

Y. Alışanovla S. Rüstəmov "Xalqlar Dostluğu" metrostansiyasının yanında yerləşən kafelərdən birində yeyib-içdikdən sonra aralarında mübahisə düşüb. S. Rüstəmov dostunun bədəninə və başına güclü zərbələr endirib. Nəticədə aldığı xəsarətlərdən Y.Alışanov ölüb.

Qeyd edək ki, S. Rüstəmov Azərbaycan Respublikası Cinayət Məcəlləsinin 120.1-ci (qəsdən adam öldürmə) maddəsi ilə ittiham olunub.

Fərid Əkbərov