Müasir saxta smartfonlar xarici görünüş baxımından artıq orijinal modellərə çox bənzəyir. Lakin onların texniki imkanları hələ də əsl cihazlardan xeyli geri qalır. Populyar YouTube kanalı Phone Repair Guru yeni videosunda saxta Samsung Galaxy S26 Ultra modelini nümayiş etdirərək, belə cihazların nə qədər peşəkar şəkildə hazırlandığını göstərib.
Lent.az xarici mediaya istinadla xəbər verir ki, bloqerin sözlərinə görə, cihaz ilk baxışdan o qədər inandırıcı görünür ki, hətta diqqətli istifadəçilər belə onu orijinal modeldən ayırmaqda çətinlik çəkə bilər.
Saxta smartfon dizayn baxımından təxminən 1300 dollarlıq flaqman modelini demək olar ki, tam təkrarlayır. Korpusun forması, düymələrin yerləşməsi və ümumi görünüş premium cihaz təəssüratı yaradır.
Lakin qablaşdırma mərhələsində ilk fərqlər üzə çıxır. Qutu dizaynı və istifadə olunan materiallar Samsung məhsullarının rəsmi üslubuna uyğun gəlmir.
Daha detallı baxış zamanı isə kamera blokunun formalarının düzgün olmadığı, korpus əyriliklərinin fərqləndiyi və S Pen stilusunun orijinal modellərlə uyğun gəlmədiyi məlum olub.
Cihaz söküldükdən sonra fərqlər daha aydın görünməyə başlayıb. Saxta modeldə “Snapdragon prosessoru”, “12 GB RAM” və “512 GB yaddaş” kimi flaqman xüsusiyyətləri göstərilsə də, əslində içəridə 10 illik köhnə prosessor, cəmi 2 GB operativ yaddaş və 16 GB daxili yaddaş yerləşdirilib.
Bloqer bildirib ki, cihazda yalnız bir real kamera mövcuddur, digər dörd kamera isə sadəcə görüntü üçün hazırlanmış “maket”lərdir. Foto və video keyfiyyəti də orijinal Samsung Galaxy S26 Ultra ilə müqayisədə xeyli zəifdir.
Bundan əlavə, smartfon sadələşdirilmiş və qeyri-sabit proqram təminatı ilə işləyir. Sistem vizual olaraq One UI interfeysini təqlid etməyə çalışsa da, bir çox premium funksiyalar mövcud deyil.
Müəllifin sözlərinə görə, 2026-cı ildə bu cür saxta cihazlar əvvəlki illərlə müqayisədə daha peşəkar hazırlanır və onları aşkar etmək üçün artıq daha diqqətli yoxlama tələb olunur.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
