Marqet şəhərini Britaniyanın cənubunda pop musiqisinin kraliçası Madonna “özünün ideal cənnəti” adlandırıb.
Lent.az bu barədə xarici mediaya istinadla xəbər verir.
“Qumlu çimərliyi, məşhur bazarı və sürətlə inkişaf edən incəsənət səhnəsi ilə Marqet getdikcə daha çox ziyarətçi cəlb edir. Lakin onun son turisti şəhərə yeni şöhrət qazandırdı”, – xəbərdə qeyd edilir.
Pop musiqisinin kraliçası Madonna ötən həftəsonu Marqetdə keçirilən incəsənət festivalına səfərindən fotoları "Instagram" profilində izləyiciləri ilə paylaşıb.
Bu, onun son üç ay ərzində şəhərə ikinci səfəri olub.
“Şəhərin sanki hər yeri həyat və yaradıcılıqla doludur. Yazıçılar və performans sənətçiləri, fotoqraflar və rəssamlar... Bu, mənim cənnət təsəvvürümdür. Ora hər dəfə gedəndə özümü yuxuya düşmüş kimi hiss edirəm”, – o, “Instagram”da yazıb.
Kent qraflığında yerləşən Marqet son illərdə inkişaf edən incəsənət mühiti, butik mağazaları, dəbli pab və kafeləri ilə yaradıcı insan axını yaşayır və İngiltərənin ən “cool” dənizkənarı şəhəri kimi təsvir olunur.
Şəhərin ən böyük görməli yerlərindən biri çoxsaylı ənənəvi attraksionları olan Dreamland Marqet əyləncə parkıdır.
O, həmçinin şəhərdə sevdiyi italyan restoranının olduğunu əlavə edib:
“Bütün bunlardan əlavə, sevdiyim italyan restoranında nahar edə bilirəm. Amma adını heç kimə deməyəcəyəm, çünki onda hamı ora gedər, halbuki orada cəmi bir masa var!”
Məqalədə qeyd olunur ki, söhbət böyük ehtimalla “Bottega Caruso” restoranından gedir.
Xatırladaq ki, Marqetdə ingilis rəssamı Tracey Eminin iqamətgahına səfəri zamanı Madonna sovet papağı – uşanka geyinərək foto paylaşıb. Bu isə ukraynalıları məyus edib. Çünki Madonna 2022-ci ildə başlayan Rusiyanın Ukraynaya qarşı təcavüzünü dəfələrlə qınayıb.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
