"Oskar" kino mükafatının qırmızı xalçası bir çox ikonik obrazlara şahidlik edib, lakin bəziləri tarixə həm də xüsusi bir səbəblə düşüb. Bir neçə aktrisa nüfuzlu qızıl heykəlciyi hamilə olduqları vaxt alıblar ki, bu da həmin mükafatlandırma gecəsini onlar üçün ikiqat sevinc anına çevirib.
Belə "qoşa" çıxışlara nadir hallarda rast gəlinsə də, hər biri yaddaşlarda dərin iz qoyur.
Lent.az hamilə vaxtı “Oskar” alan 4 aktrisanı təqdim edir.
Natali Portman
2011-ci ildə keçirilən "Oskar" mərasimində o, "Qara ququşu" (Black Swan) filmindəki roluna görə "Ən yaxşı qadın rolu" mükafatını qazanıb. Natali bu ekran əsəri üzərində işləyərkən, 2009-cu ildə xoreoqraf Benjamin Milpye ilə tanış olub.
Mərasim baş tutanda o, Milpyedən altı aylıq hamilə olub. Aktrisa bu vacib gecə üçün "Rodarte" brendindən zərif bənövşəyi don seçib. Maraqlıdır ki, bu brendin yaradıcısı olan iki bacı həm də filmdəki dramatik kostyumların müəllifləri olublar. Natalinin obrazı dərin dekolte, asimmetrik ətək və kristal bəzəklərlə tamamlanıb. Cütlük 2012-ci ildə evlənsə də, bu evlilik 2024-cü ildə ayrılıqla nəticələnib.
Ketrin Zeta-Cons
Aktrisa "Çikaqo" filmindəki "Ən yaxşı ikinci plan qadın rolu"na görə qızıl heykelciyə layiq görülüb. Bu tarixi hadisə 2003-cü ilin mərasimində baş verib və həmin vaxt Ketrin qızı Kerisə səkkiz aylıq hamilə olub.
Mükafatı qəbul edərkən o, zarafatla deyib: "Hormonlarım o qədər nəzarətsizdir ki, bununla bacarmaq çətindir!" Hətta hamilə olmasına baxmayaraq, mərasim zamanı "All That Jazz" mahnısını ifa edib. O gecə aktrisa "Versace"dən şokolad rəngli, krujeva bəzəkli və dərin dekolteli libas geyinib. Qızı mərasimdən cəmi on gün sonra dünyaya gəlib.
Reyçel Vays
Ulduz aktrisa 2006-cı ilin "Oskar" mərasimində yeddi aylıq hamilə olub. Həmin gecə o, "Sadiq bağban" (The Constant Gardener) filmindəki obrazına görə "Ən yaxşı ikinci plan qadın rolu" mükafatını alıb.
Dizayner Narsiso Rodriqes aktrisa üçün üç müxtəlif don hazırlayıb və Reyçel onlardan çiyinləri açıq, sərbəst kəsimli qara libası seçib. Onun oğlu Henri 2006-cı ilin mayında doğulub. Uşağın atası amerikalı rejissor Darren Aronofski olub. Daha sonra cütlük ayrılıb və Reyçel 2011-ci ildə Daniel Kreyq ilə ailə həyatı qurub.
Meril Strip
1983-cü ildə Meril Strip dördüncü dəfə "Oskar"a namizəd göstərilib və ikinci övladını gözləyib. Aktrisa həmin axşam qalib gələcəyini bəlkə də gözləməyib, lakin qızıl heykəlcik yenidən ona qismət olub. Bu mükafat onun muncuq və payetlərlə bəzədilmiş qızılı rəngli sərbəst kəsimli donu ilə mükəmməl uyğunluq təşkil edib.
Strip "Sofinin seçimi" (Sophie's Choice) filmindəki baş roluna görə qalib gəlib. Səhnə arxasında ondan gələcək qızına bu möhtəşəm gecə haqqında nə danışacağını soruşduqda, o, sadəcə belə cavab verib: "Onun da burada olduğunu deyəcəm". Həmin vaxt altı aylıq hamilə olan aktrisa, avqust ayında qızı Meymini dünyaya gətirdi.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
