Rəşad Sadıqov: “Dnepr”dən bir qədər ehtiyatlanırdıq”

“Qarabağ”ın kapitanı Rəşad Sadıqov Avroliqanın qrup mərhələsində “Dnepr”ə qalib gəldikləri oyunu dəyərləndirib. Lent.az-ın azerisport.com-a istinadən verdiyi məlumata görə, təcrübəli müdafiəçi rəqibi “feyr-pley”ə əməl etməməkdə günahlandırıb: “Çox vacib və ağır oyun idi. “Dnepr”in heyəti çox güclüdür, üstəlik, komanda Ukrayna çempionatında yaxşı çıxış edir. Onların iştirakı ilə keçirilən bir çox oyuna baxmışdıq. Açığı, rəqibdən bir qədər ehtiyatlanırdıq. Bununla belə, ilk dəqiqələrdən çalışdıq ki, həyəcan hissini üzərimizdən ataq. Əsas məqsəd uduzmamaq idi. Yaxşı ki, qələbə qazandıq. Rəqib futbolçular kobud oynayırdılar. Hətta “feyr-pley”i unutduqları anlar da oldu”.