Dondurma düzgün tərkibə malik olduqda və həddindən artıq yeyilmədikdə, düşünüldüyü qədər zərərli olmaya bilər, bəzi hallarda isə balanslı rasiona daxil edilə bilər.
Lent.az xarici mediaya istinadən xəbər verir ki, 20-40 il ərzində alimlər təxminən 190 min yetkin insanın qidalanmasını, fiziki aktivliyini və sağlamlıq vəziyyətini izləyiblər.
Nəticələr göstərib ki, həftədə ən azı iki dəfə dondurma yeyən şəxslərdə Tip 2 diabet inkişaf etmə riski təxminən 22 faiz daha aşağı olub. Bu əlaqə iştirakçıların çəkisi, gündəlik kalori qəbulu və fiziki aktivlik səviyyəsi nəzərə alındıqdan sonra da qorunub saxlanılıb.
Tədqiqatçılar qeyd edirlər ki, bu nəticələr dondurmanın birbaşa faydasını sübut etmir. Ehtimal olunur ki, bu şəxslərin ümumi həyat tərzi və qidalanma vərdişləri fərqli olub. Buna baxmayaraq, mütəxəssislər hesab edir ki, keyfiyyətli dondurma ölçülü miqdarda istifadə edildikdə maddələr mübadiləsinə mütləq mənfi təsir göstərmir.
Mümkün izahlardan biri süd yağının quruluşu ilə bağlıdır. Təbii süd məhsullarında yağ mikroskopik damcılar şəklində olur və xüsusi zülal və fosfolipid qişası ilə əhatələnir. Bu struktur yağların mənimsənilməsinə, xolesterinin emalına və orqanizmin insulin reaksiyasına təsir edir.
Bu səbəbdən təbii süd məhsulları bəzən tərkibində doymuş yağlar olsa da, sağlamlığa neytral və ya qismən müsbət təsir göstərə bilər.
Bununla yanaşı, ekspertlər xəbərdarlıq edirlər ki, hər dondurulmuş deserti əsl dondurma hesab etmək olmaz. Bir çox məhsulda bitki yağları, stabilizatorlar və emulqatorlar çoxluq təşkil edir ki, bu da süd yağının təbii strukturunu pozur və məhsulun potensial faydalarını azaldır.
Mütəxəssislər alış zamanı tərkibə diqqət yetirməyi tövsiyə edirlər: keyfiyyətli dondurmanın əsasını süd və ya qaymaq təşkil etməli, inqrediyent siyahısı isə qısa və aydın olmalıdır. Ən optimal variant kimi qaymaq, süd, yumurta sarısı, şəkər və təbii vanil göstərilir.
Alternativ olaraq ev şəraitində hazırlanan dondurma da daha faydalı seçim sayılır, çünki bu zaman tərkibə tam nəzarət etmək və əlavə qatqılardan qaçmaq mümkündür.
Alimlər yekunda bildirirlər ki, dondurmanı superqida kimi qəbul etmək doğru deyil, lakin təbii və keyfiyyətli desert ölçülü miqdarda balanslı qidalanmanın bir hissəsi ola bilər.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
