Sevdiyi qızı qətlə yetirənin məhkəməsi başlayıb

Bakı Ağır Cinayətlər Məhkəməsində 1990-cı il təvəllüdlü Babək Əliyevin cinayət işi üzrə məhkəmənin hazırlıq iclası başlayıb. B.Əliyev sevdiyi qızı qətlə yetirməkdə təqsirləndirilir.

Lent.az-ın məlumatına görə, hakim Cavid Hüseynovun sədrliyi ilə keçirilən prosesdə təqsirləndirilən şəxsin anket məlumatları dəqiqləşdirilib.

Məhkəmənin baxışı martın 3-nə təyin edilib.

Qeyd edək ki, hadisə keçən il oktyabr ayında baş verib. 1990-cı il təvəllüdlü Babək Əliyev İlahə Yusubovanı qətlə yetirib. O, istintaqa ifadəsində bildirib ki, dəfələrlə tanışı İ.Yusubovaya evlilik təklifi edib, lakin heç vaxt qarşılıq almayıb. Keçən il oktyabrın 29-da B.Əliyev sevdiyi qızı metronun “Qara Qarayev” stansiyasının yaxınlığına görüşə çağırıb. Növbəti dəfə rədd cavabı alan B.Əliyev İ.Yusubovanı yerə yıxaraq ona 15 dəfə bıçaq zərbəsi endirərək xüsusi amansızlıqla qətlə yetirib.